Korsilett og fléttur...

Inga Dagný vinkona mín er ekta dama og við getum margt lært með því að deila reynslu okkar og öllum svona lekkerum og dömulegum fréttum. Hún sendi á okkur góð ráð um hvernig við ættum að haga okkur í útivistarferðum í sumar þegar sólin okkar kemur...

Til að halda sér lekkeri og elegant er gott að vera með hárið í fléttum...verulega smellið og lekkert ráð og svo náttúrulegt og unglegt og íslenskt eitthvað. Og svo aðaltrikkið...reyndar ættað frá Heiðari okkar elskulegum...að vera í smekklegu korsiletti undir útivistargallanum og láta þá skína í blúndurnar við hentug tækifæri...

Sem minnir okkur á að það eru enn tök á því að komast í lúxuskvennaferðina sem Ferðafélag Íslands stendur fyrir 15.-19.ágúst, þar sem gengið verður hinn yndislega og rómaða Laugaveg. Þetta er trússferð þannig að við getum nánast verið á hælaskóm...nei en smart væri það að vera á Nikehælum! Drífum okkur endilega elskulegu dömur! Gasalega held ég að það verði gaman.

Verð að láta fjúka með eitt dásamlegt sem ég var að prófa...

Blandið saman: 2 bollum af þurrkuðum rósum, 2 bollum af vatni og 1 bolla af vodka. Setjið í lokaða krukku og geymið við stofuhita í nokkra daga þá verður til dásamlegt rósavatn sem má nota í baðið eða setja nokkra dropa útí möndluolíu og nudda uppúr...hleypir fjöri í flesta eiginmenn og kærasta, jafnvel eldri menn sem mega ekki vamm sitt vita!!´Júnóvatæmín!!!!

Munið svo að vera góðar við ykkur og gefa ykkur eitthvað fallegt öðru hverju. Dekrið við ykkur með því að panta lit og plokk, andlitsbað..maní og pedí! Ef það er orðið áliðið mánaðarins og veskið orðið tómlegt er alltaf gott að láta renna í baðið með rósolíunni, kveikja á kertum og hlusta á góða slökunartónlist! Tala nú ekki um að stilla litlu lekkeru kristalsglasi á baðkersbrúnina og dreypa á einhverjum lekkerum dömudrykk...það er náttúrulega punkturinn yfir i-ið!

korsilettuknús

a

Frekar dey ég en að vera ósmart....

Elskulegu dömur, þetta er svo góður frasi! Ég var nú að hugsa þetta í morgun þegar ég klæddi mig í slyddugallann...verulega ósmart!Það var bara ekki um neitt annað að ræða en að fara aftur inn og fara í pils og blússu, setja upp hárið og fara í þykkar sokkabuxur, jú auðvitað bleikar blúndur og svona eitthvað soldið lekkert varð það að vera því ég þurfti að fara í kaupfélagið og kaupa inn. Fór með körfuna og keypti alls konar hollustu í kálsúpuuppskrift sem vinkona mín sendi mér frá Danmörku. Gasalega góð súpa fyrir mittismálið víst... nú verður gaman að prófa hana og sjá til hvernig þetta virkar og máta svo nýja bikiníið bleika. Verst að það skuli ekki vera leyfilegt að vera á hælum í sundlauginni... bara að sumarið fari nú að koma!

Við Kata vinkona erum byrjaðar að æfa okkur fyrir göngur sumarsins. Fyrst förum við í Kerlingarfjöllin, vonandi eru þetta soldið dömuleg fjöll og ekki mjög erfið yfirferðar. Við förum svo með Ferðafélagi Íslands í kvennaferð. Það er ekta dömuferð með trúss og alls konar svo við getum fengið okkur aðeins í staupinu á kvöldin. Voða lekkert að vera með ferðabar og kristalstaup í svoleiðis ferðum. Við ætlum að ganga Laugaveginn með nokkrum eðaldömum. ÞAð verður sól og huggulegt, ég finn það á mér! Það eru næstum 20 ár síðan ég fór síðast svo það er víst betra að fara sér hægt. Þá vorum við með allt á bakinu en núna erum við með prívatbíl sem fylgir okkur eftir svo þetta verður allt annað og miklu smartara. Enda eins gott því við verðum að vera smart í tauinu á svona göngum um hina íslensku náttúru okkar sem er svo lekker og lagleg.

Heyrumst fljótt elskurnar

óbyggðaknús

a

Láttu ljós þitt skína í lífinu með því að lýsa öðrum

Sælar elskulegu dömur,

 

Afskaplega ólekkert veður þessa dagana. Það er alltof mikill blástur fyrir minn smekk. Ekki nærri því eins auðvelt að vera lekker og dömuleg þegar hárið fýkur út og suður og sandkornin fylla augun! Eina ráðið er þá að kaupa sér lekkera goltreyju í björtum litum og bandaskó í stíl, varalita sig feitt og setja upp gulu sólgleraugun eða bjartsýnisverðlaunin eins og systir mín segir. Það verður bara  allt sólgult í kringum mann  með þessi gleraugu, alveg yndislegt og fallegt eins og þegar sólin skín.

Við fórum í dömuferð 30 saman í gær. Alveg yndislegt og virkilega skemmtilegt. Við lögðum af stað um 11 fyrir hádegi og ókum austur í Hrunamannahrepp þar sem Sigurður bóndi tók á móti okkur og sýndi okkur ættaróðalið Hrepphóla. Við skoðuðum líka kirkjuna þeirra, einstaklega falleg lítil og lekker sveitakirkja. Algjör draumur þessar gömlu íslensku sveitakirkjur! Við fórum síðan að Flúðum og heimsóttum tómatabóndana á Melum. Stórkostleg og heilnæm ræktun sem á sér stað þarna. Fengum að smakka alls konar hollustutómata og svo fengum við bleikt og afar lekkert kampavín með. Þessu næst fórum við svo að skoða Silfurber og fengum að smakka nýtínd jarðarber og enduðum svo á að skoða Flúðasveppi og smakka beint af beðinu. Alveg frábært og mjög skemmtilegt.

Við fórum svo og vígðum nýtt og glæsilegt kaffihús á Flúðum og skoðuðum gistiheimili í sama húsi. Þar fengum við kaffi og meðí! Ég verð nú að segja að þetta er virkilega lekkert og dömulegt kaffihús, blúndurúmföt og gasalega hugguleg herbergi. Ég á nú örugglega eftir að skreppa með minn í rómóferð þarna uppeftir einhverja helgina þegar vel liggur á okkur.

Eftir allt þetta fórum við svo í Hruna og heimsóttum prestfrúna þar. Hún er lærð leirlistakona og er með gallerí við túnfótinn á prestsetrinu. Afskalega flott hjá henni en frekar fáir hlutir til. Selst örugglega allt strax frá henni. Við skoðuðum kirkjuna í Hruna líka, hún er voða sæt en Hrepphólakirkjan er nú enn meira krútt.

Eftir allt þetta lá svo leiðin að Geysi í Haukadal. Þar var heldur betur tekið vel á móti okkur eins og venjulega. Við fengum dúmjúkar lambalundir og rauðvínstár og svo kaffi og grand á eftir og kókoskúlur. Gasalega gott og huggulegt, ummm!

Svo var haldið heim á leið, sungið alla leiðina úr söngbók Dísu og það voru glaðar og lekkerar dísir sem komu heim að kvöldi eftir einstaklega vel heppnaðan dag!

Hvað haldiði svo! Marianne er orðin amma! Hún hringdi og lét mig vita að það væri komin yndisleg lítil dama...svo lík ömmunni sinni. Nú verðum við dömurnar að hjálpast að og kenna Marianne aðeins með svona helstu dömuömmuuppeldisaðferðirnar því hún hefur bara átt stráka fram að þessu! Við ætlum að fara og kaupa kjóla og bleik dress á morgun...ó svo spennandi!!

Jæja elskulegu dömur, eitt svona í lokin ...munið frasana...frekar dey ég en að vera ósmart!!!

ömmuknús

a

Lautarferð í Þrastarskóg

Það hefur blásið duglega hér á okkur sunnlenskar dömur í dag. Ég barðist við að hengja út á snúru en gafst upp og ákvað að fara í lautarferð með barnabörnin. Við mæðgurnar fórum með nesti í körfu og teppi í skóginn græna. Þar var indælt, logn og blíða sumarsól, fuglar kvökuðu á grein og við gengum um fallega stíga og tíndum nokkra köngla til að eiga í lekkerar skreytingar síðar meir! Já það er alltaf gott að eiga svona sætt náttúrudót til skreytinga, hvort heldur er um jól eða í annan tíma.

Við komum svo heim um kvöldmatarleitið og skelltum upp soðningu, ljómandi góðir og skjannahvítir þorskbitar úr Bónus og gufufsoðnar gulrætur. Börning vilja fá stappað með smjöri, -amma gerðu löggustöð með tómatsósu!Allt látið eftir þeim enda eru þau náttúrulega fullkomin Guðsgjöf þessar elskur.

Já þið heyrið að mín er komin í hollustugírinn á ný. Fór í Heilsubúðina í dag og keypti eplaedik, Spirulinadrykkinn góða og þennan dásamlega ACidophilus sem hún Eygló í Lifandi Húsi benti mér á. Þvílíkur léttir að taka þetta inn! Ég er bara svo létt á mér og ljúf í lund!

 Nú svo skokkaði ég í skóginum með börnunum og nú erum við Kata mín búnar að ákveða að fara að ganga úti og undirbúa okkur undir gönguferðir sumarsins. Við förum náttúrulega í okkar árvissu Abbalabbaferð og nú er nefndin búin að skipileggja ferð í Kerlingarfjöllin. Svo er kvennaferð 15.ágúst með Ferðafélagi Íslands um LAugaveginn, Lúxuskonuferð....Endilega skráið ykkur með! Það er enn laust fyrir nokkrar dömur...

Nú er ég að fara að horfa á æðislega dömulega mynd sem dóttir mín lánaði mér og heitir The Holiday. Heyrumst á morgun elskurnar.

Lifum og leyfum öðrum að lifa!

Lautarknús

a

Heima á Fróni og sólin kom með!

Sólin er sönn dama eins og við. Hún flaug með okkur til Íslands og gleður okkur nú dag eftir dag. Ég rauk auðvitað til og þvoði af rúmunum og hengdi út eins og sannri íslenskri húsfreyju sæmir. Ekki nóg með það, auðvitað verður að nota þerrinn og viðra öll rúmföt og svo alla lekkeru kjólana og blúndudressin úr fataskápunum! Það jafnast fátt á við að hátta ofan í tandurhreint rúmið sitt, angandi af sólskini.

Við íslensku dömurnar erum einstakar og gleðjumst af hjarta þegar sólin skín. Allt verður svo fallegt og allir verða svo brosmildir! Hafið þið ekki tekið eftir þessu? Jú það veit ég elskulegu dömur að ykkur líður alltaf vel en best þó er sólin skín.

Teklúbburinn sem fagnar sínu tíunda starfsári nú á haustmánuðum tók inn nýja virkilega lekkera tedömu í gær. Þetta var auðvitað einstakur viðburður í sögu félagsins enda daman að sunnan og mjög forfrömuð. Umsókn hennar hafði legið fyrir hjá stjórninni til umsagnar og íhugunar í nokkur ár en að vandlega íhuguðu máli var ákveðið að slá til og veita dömunni inngöngu.

Hún stóðst auðvitað inngönguprófið með sóma og mun einnig verða klúbbnum til sóma hérlendis sem erlendis. Eftir að hafa ekið uppábúin í eðaldrossíu teklúbbsins um Flóann, Selfoss og nágrenni, þreytt ýmsar þrautir og komið fram vilja teklúbbsins á öllum helstu menningarstöðum Suðurlands, var endað heima á Bakkanum þar sem við elduðum dýrindis máltíð og drukkum með Kaliforníuvín úr Napadalnum en þangað hafa Tesystur einmitt farið í menningarreisu. Það var síðan setið framundir morgun og farið yfir helstu aherslur klúbbsins og æft stíft og af alefli

Við munum senda inn myndir af þessum viðburði fljótlega svo fylgist endilega með  elskulegu dömur

Gangi ykkur allt í haginn og látið sólina skína í ykkur og á

Munið að taka alltaf tíma fyrir tesopa

ilmandi sólarknús

a

 

Nýtt heilsuráð frá mömmu

Sælar elskurnar,

Bara örstutt hér í morgunsárið danska. Hún mamma er svo klók og hugguleg dama og hefur ráð undir rifi hverju þessi elska.

Nú hefur hún kennt mér til dæmis eitt sem hefur reynst okkur í familiunni svo einstaklega vel og verið mikil heilsubót. Það er að drekka á fastandi maga 2 tsk af eplaediki úr heilum eplum, keypt í heilsubúð og 1 litla tsk af hunangi. Þetta er ótrúlega gott fyrir allt systemið og dömur sofa svo vel af þessu og eru enn lekkerari og laglegri fyrir vikið! Heldur frá öllum bakteríum og bólgum, hreinsar blóðið, eykur þrótt...það þrífst bara engin óværa á eða í!

Dásamlegt ráð og gott eins og allt sem kemur frá mömmum okkar sem eru jú yfirklassadömur.

Erum nú að taka okkur saman í litla gula húsinu okkar. Leggjum af stað til Köben um eftirmiððdaginn

Heyrumst á morgun elskulegar

a

Enn af Jótlandi hinu góða

Hún er ansi hreint röggsöm hún nágrannakona mín. Hún kom og dreif okkur öll í messu í morgun í Babtistakirkjunni hér í Brande. Okkur hefur lengi langað að skoða þessa merkilegu kirkju sem er hin óvenjulegasta sem ég hef séð. Hún var byggð í sjálfboðavinnu og allt efni í hana er endurnýtt. Gamlir múrsteinar og trjálurkar, risastór kross hangir utan á henni í sverri keðju. Kirkjubekkirnir eru úr trjábolum og stór gluggi gerður í risastóru holræsaröri, frekar flott!

Við hlýddum á Hvítasunnumessu á dönsku, þar sem inntakið var náungakærleikurinn og hversu mikilvægt það væri að muna að Guð býr í hverju okkar og við eigum því alltaf að láta okkur þykja vænt um hvert annað og reyna að gera öllum gott. Hugsa fallega um náungann og forðast slúður og ljótar hugsanir sem auðvitað koma alltaf verst við okkur sjálf. Svo var sungið mikið og ungt fólk kom fram og talaði. Þetta var afskaplega skemmtilegt og við lærðum heilmikið.

Nú er farið að síga á seinni hlutann á þessari Danmerkurdvöl okkar með foreldra og tengdaforeldra. Alveg hefur þetta verið yndislegur tími. Við erum búin að gera alveg ósköp í húsinu og garðinum. Ráða moldvörpubanann mikla Elvin sem kemur í næstu viku. Moldvörpur eru alveg hræðileg plága hér og skemma alveg ósköp. Gott að við höfum þær ekki heima á Fróni.

Bryndís okkar kom með börnin sín tvö frá Árósum í gær. Við vorum mikið ánægð að fá hana þessa elsku. Ég verð nú að segja að hún er orðin gasalega lekker dama og hefur forframast afar mikið her ude i Danmark! Hún var með svo lekkert lakk og er virkilega að undirbúa sig undir að komast inn í dömuklúbbinn og njóta lífsins lystisemda! Við dömurnar vitum nú hvað það þýðir!

En ég er hrædd um að ég verði nú að hitta á hana Hildi mína þegar ég kem heim. Hún lánaði mér svo yndislega bók um gyðjuna okkar hér á Jótlandi, Thyru drottningu Gorms hins gamla. Sú var nú ekkert blávatn! Hún átti með Gormi sínum tvo syni, Knud og Harald blátönn sem kristnaði alla Danmörku og Noreg. Þau hjónin eru heygð hér í Jelling og ég fór og vitjaði þeirra. Sagan segir að þau Gormur og Thyra hafi deilt um það hvort væri betra að vera heiðinn eins og hann eða kristin eins og hún. Thyra sagði að það mundi verða ljóst eftir þeirra dag. Hvað kemur svo á daginn...ofan á hennar gröf eða haug, spratt upp helg laug þar sem margir hafa leitað sér lækninga. Já ég held að við dömurnar förum til Jelling í Pílagrímsferð og hyllum Thyru okkar.

Nóg um þetta í bili.

Við leggjum í hann á morgun, keyrum til Köben og fljúgum svo til Íslands. Þá verða teknir upp enn frekari dömusiðir og fram bornir ykkur og okkur til heilla elskulegu dömur!

 

Smáviska úr bókinni góður frá Lúndúnadömunni:

Vertu í mómentinu elskulega lekkera dama

Heimspeki  búddista segir m.a. að ef við einbeitum okkur að augnablikinu, að því sem er að gerast hér og nú er næsta víst ef ekki alveg 100 % sikkert ,-að við tökum hlutunum eins og þeir gerast af æðruleysi og umburðarlyndi. Þar með hættum við að hafa áhyggjur af ókomnum hlutum eða velta okkur uppúr því sem var og við hefðum átt að gera eða segja öðruvísi...

Verum í mómentinu og afeitrum okkur af ahyggjum til frambúðar!

Góður punktur elskurnar

knús og kram fra Jylland , det herlige!

a

Verum góð við jörðina okkar

Elskulegu dömur,

Smá viskukorn úr bókinni góðu:

Gerum eitthvað gott í dag, vinnum í garðinum, verum úti í náttúrunni og náum tengslum við hana, gróðursetjum, vökvum, verum úti í sólinni, sáum, plöntum, gefum aftur til jarðarinnar sem gefur okkur allt það besta, gerum eitthvað gott til að bæta umhverfið og vernda ósonlagið okkar.

Hjólum og spörum bílinn.

Det er saa dejligt i Danmark!

hjertelig knus og kram

a

Fiskarnir fjölga sér og froskarnir líka

Hér erum við enn í sól og sumaryl. Froskarnir og fiskarnir í tjörninni hafa fjölgað sér. Við erum á fullu allan daginn í garðinum og vinnum vel. Það er málað og gróðursett og skafið og skrapað, sungið og borðað...ó my ó my..hvað það er góður matur her i Danmark..

Við fórum í dag og skoðuðum mjög flottan búgarð, 10 hektara jólatrésbúgarður. Nú er det sporgsmalet hvis vi skal köbe den og hygge os hele aret i Danmark!

Allt gengur svo vel. Við skemmtum okkur vel en höfum farið heldur lítið í búðir og höfum ekki skoðað nein dömuföt. Kannski gerum við það á morgun.

Miranda nágranni og hennar familia koma á morgun og borða hjá okkur. Við verðum 13 við matarborðið og ég held ég verði með fyllt kalkúnabrjóst, það er svo lekkert og smart!

Hér eru allir í heyskap. Fyrsta slætti er lokið og menn eru ánægðir með uppskeruna. Við borðuðum nýjar kartöflur í kvöld og ungverska gúllassúpu. Það var ósköp gott og notalegt. Í gærkvöldi spiluðum við vist en núna spilar pabbi á gítarinn og við syngjum öll með.

Verð að fara og syngja með og halda uppi fjörinu með þeim. Þau eru svo skemmtileg þessar elskur.

Músíkknús

a

Det er saa dejligt i Denmark

Elskulegu lekkeru dömurnar mínar,

 Nú erum við í Danmörku. Úti á Jótlandi í sól og sumaryl í litla sæta gula og dömulega sveitabænum okkar með stráþakinu. Það er svo yndislegt að vera hér. Það er ótrúlega margt sem dama getur lært af dönunum. Þeir eru svo mikið í núinu, allir alltaf að njóta augnabliksins! Það er svo mikilvægt. Ég áttaði mig á því þegar ég fór að vera hér að ég er bara þó nokkuð stressuð og er svo oft að drífa mig eitthvert... en ég er að laga þetta! Ég er að venja mig á að vera á staðnum og njóta þess að tala við fólk og hlusta. Ekki bara að hugsa um allt sem ég á eftir að gera. Ég vanda mig á hverjum degi við að lifa lífinu með fullri meðvitund og njóta þess. Nú veit ég hvað ég vil og hvert ég stefni en flýt ekki með hugsunarlaust.

Við erum hér með foreldra okkar. Það er svo gaman og þau eru svo ánægð öllsömul. Í dag setti tengdapabbi upp fyrir mig snúrustaura svo ég get þvegið og hengt út í fyrramálið. Það er ekkert sem jafnast á við útiþurrkaðan þvott. Hugsa sér hvað það er dömulegt að lauga sig og bera á sig gott krem og skríða svo uppí tandurhreint og ilmandi rúm! Umm það er svo mikill lúxus og dama sefur eitthvað svo vel og dreymir svo fallega.

Ég fór svo með foreldra mína og tengdamömmu í bæinn og við fengum okkur öl og smörrebröd í sólinni. Síðan fórum við og keyptum okkur matjurtir, kryddjurtir og appelsínutré, já og ólívutré líka. Auk þess keyptum við pelagóníur, rauðar og hvítar í alla pottana og mamma gróðursetti þetta allt með sínum grænu puttum. Hún gaf mér líka rósir sem við ætlum að gróðursetja á morgun. Þetta er svo skemmtilegt. Gúndi minn eldaði svo pörusteik og brúnaði kartöflur og við höfðum það virkilega huggulegt í kvöld.

Á morgun ætlum við að keyra út á Hvide Sand sem er vesturströndin hér. Það spáir rjómablíðu á morgun svo við eigum góðan dag framundan eins og vant er. Það er dásamlegt!

Vinkona mín í London gaf mér svo skemmtilega litla bók til að hafa í veskinu,- alltaf og lesa í henni í hvert skipti sem mig vantar andlega upplyftingu. Ég ætla að deila með ykkur vísdómnum úr henni á hverjum degi. Ég opna hana og skrifa til ykkar...nú kemur:

Vatn, vatn, vatn

Drekkum 1 og 1/2 lítra af vatni daglega. Það gefur okkur rétt rakastig í húðina, endurnýjar og hreinsar hana, hreinsar allt systemið og örvar okkur til dáða.

Haldið áfram að vera fallegar og dömulegar elskulegu dömur og munið að njóta þess í botn!

Við eigum allt það besta skilið

jyllands knus og kram

a