Mexíkósk matarboð fyrir gulrætur

Elskuleg vinkona mín og lekker dama hér af sunnlensku bergi brotin kom að máli við mig í kvöld. Hún er ein af okkur sem styðjum sterklega við bakið á íslenskum garðyrkjubændum þessa dagana. Hún er á áttunda degi á grænu fæði og hefur á tilfinningunni að hún sé að breytast í gulrót! Já, þetta er algeng tilfinning hjá okkur dömum og því verðum við að bretta upp blúndurnar og vera duglegar að halda matarboð og gera eitthvað skemmtilegt og nýtt og ferskt svo við verðum ekki leiðar.

Ég var til dæmis með mexíkóskt matarboð hér í kvöld. Ótrúlega einfalt og gott...allir koma saman og brytja smátt í skálar, alls konar grænmeti: lauk, iceberg, gúrkur, tómata, papriku. Svo er stappað avókadó í eina skál, sýrður rjómi í aðra, steikjum smánautahakk eða brytjum niður kjúklingabringu. Allt hitt kemur tilbúið í dósum, nýrnabaunakæfa, Tacosósa, ostasósa, jalapeno...hendum svo nokkrum pönnukökum í ofninn, Dorritos í eina stóra skál og allir eru glaðir! Þarf ekki einu sinni Tequila! Við grænu dömurnar veljum síðan vandlega á okkar disk það sem þar fer best...og samgleðjumst svo hinum sem vilja gúffa í sig gromsinu...

Þær sem eru núna á seinni vikunni í forsögufæðunni eru farnar að sjá mikinn mun á húðinni og eru allar svo léttar og kátar að innan og utan. Það þarf auðvitað heilmikinn sjálfsaga til að standa sig í 14 daga og hver dagur sem við stöndumst bætir við sjálfmatið og vissuna um það að við getum allt sem við viljum. Setjum okkur markmið, stöndum með okkur sjálfum og finnum hvað það veitir okkur mikla vellíðan. Svo verðum við að muna að verðlauna okkur með dekri og dúlleríi við dömuhæfi. Fótsnyrting, handsnyrting, klipping og litun...nudd og haustlitaferð á Þingvelli....Allt nema ALLS ENGAN SYKUR!!!

Já, það er svo dásamlegt að vera dama

Munið að hamingja er smitandi. Látið það byrja hjá ykkur og komum faraldrinum af stað strax í dag.

Brosum og gefum af okkur elskurnar...gulrætur eru góðar!

knús

a